धादिङ । श्रीमानबाट श्रीमती पीडित भएको गुनासो समाजमा बढिरहेका बेला पछिल्लो समय धादिङमा भने श्रीमती पीडित पुरुषहरु पनि न्यायका लागि सम्बन्धित निकायमा पुग्न थालेका छन् ।
पुरुषहरु श्रीमतिबाट पीडित भएको भन्दै सम्बन्धविच्छेदका लागि मुद्दा दर्ता गराउन अदालत जान थालेका हुन् । विशेषगरी बैदेशिक रोजगारमा रहेका श्रीमान श्रीमतीबाट पीडित भएको भन्दै न्यायकोे बाटो खोज्दै आदालत पुग्ने गरेका छन् ।
चालु आर्थिक वर्षको ७ महिनाको अवधिमा जिल्ला अदालत धादिङमा सम्बन्ध विच्छेदका १ सय ८२ मुद्दा दर्ता भएकोमा १ सय १९ महिला र ६३ जना पुरुष रहेका छन् । नयाँ मुलुकी संहिता लागू भएपछि सम्बन्ध विच्छेदका मुद्दा लिएर पुरुष जिल्ला अदातल धाउन थालेका हुन् ।
भदौ १ गतेबाट नयाँ मुलुकी संहितासम्बन्धी ऐन प्रचलनमा आएपछि पुरुषले पनि अदालतमा सम्बन्ध विच्छेदका मुद्दा दर्ता गराउन पाइने व्यवस्था छ । माघ मसान्तसम्म दर्ता भएको १ सय ८२ सम्बन्ध विच्छेदका मुद्दामध्ये ८८ मुद्दा फछ्र्यौट भइसकेको जिल्ला अदालत धादिङका श्रेस्तेदार नवराज दंगालले जानकारी दिए ।
